أمنا ايريني بتقولك اديني كوباية زبادي من بتوع الدير
أنا اسمي نرمين س، وفي مرة روحت زيارة لدير أبوسيفين للراهبات في مصر القديمة سنة 2003 كنت رايحة مع واحد من خدام الدير وبعد ما وصلنا انشغل هو في الخدمة فدخلت الكنيسة وقعدت جنب الهيكل وكنت بأعيط على طول علشان كان فيه مشكلة بيني وبين صديقة لي. وأنا قاعدة لقيت واحدة راهبة لابسة أسود جت وخبطت على كتفي وقالت لي: مالك؟ بتعيطي لي؟ فقلت لها: مش بأعيط (ده طبع في أقول مش بأعيط لما حد بيسألني بتعيطي ليه؟) فقالت لي: الدموع دي معناها انك بتعيطي فقلت لها: فيه واحدة صاحبتي وأنا زعلانين مع بعض وما بنكلمش بعض وأنا متضايقة جدا فقالت لي: أمسحي دموعك وماتزعليش وسيبيها على ربنا وهترجعوا لبعض تاني في يوم من الايام وتتكلموا مع بعض بعد كده أنا سكتت شوية وبعدين قالت لي: روحي المطبخ لأمنا فولانة وقولي لها أمنا ايريني بتقولك اديني كوباية زبادي من بتوع الدير فروحت المطبخ وسألت عن أمنا فولانة وقلت لها: أمنا ايريني بتقولك اديني كوباية زبادي من بتوع الدير فقالت: أمنا ايريني مين؟ فقلت لها: أنا معرفش هي مين. هي قالت لي أوصل لك الرسالة دي مش أكتر فقالت لي: أمنا ايريني! أنتي متأكدة؟ فقلت لها: متأكدة فقالت لي: دي أمنا ايريني مابتنزلش من قلايتها بقى لها أسبوع أو اكتر والدكاترة مانعينها من النزول وعطيتني الزبادي واكلتها. وبعد ما تنيحت أمنا ايريني وشفت صورها وكتبها عرفت أن هي دي أمنا ايريني اللي أنا شفتها نفس الوش واللي اعرفه هو ان مكانش ليها اي صور وهي عايشة وعرفت أنها شعرت بحزني بالروح وجاتلي الكنيسة.
